Giuseppe Mezzadri
I RACCONTI
DELLA STALLA - I FAMIGLI
E’ un esempio
di prosa completamento in dialetto
In-t-il storij ch’a s’ cóntäva in-t-la stala gh’era sémpor anca còlli di famì. I
famì, o famì da fagòt, j éron ragasén che la so famija la tribuläva a mantgnìria
e alóra, par socuant ani, j gnävon “imprestè” a dilj ältri famìji ‘d paizàn par
jutäria in-t-i lavór di camp in cambi dal magnär e dal dormir.
A s’ pól imaginär al magón e la tristèssa äd chi povor ragas lontàn da ca e lasè,
dil volti, indo’ miga sémpor i gnävon tratè con umanitè. Podäva anca capitär ch’ja
fisson dormir in-t-la stala.
Cuand éra ragas mi, me pedor, cuand al me vräva fär paura, al me dzäva:"Guärda
ch'a t’ mand par famì!".
I famì j éron la categoria pu povrètta, j éron propria a l’ultom post. In-t-la
realtè j éron sól che di povor ragas, mo in-t-il storiéli che i vec’, d’inveron,
i cóntävon in-t-la stala, j éron coj ch’a la spontäva sul padrón ch’al sarcäva
‘d färia lavorär bombén e därogh poch da magnär.
GALATEO
Un famì, dop aver
lavorè tutt al dì, al s’éra miss a tävla insèmma al so padrón par snär.
Dop la mnéstra, par sécond a gh’era un piat con do bistècchi, vunna a tésta.
Al famì ch’l’äva magnè ala zvelta al tira zo par prìmm e ‘l tira zo la bistècca
pu grosa.
Al padrón, la coza la ‘n gh’era miga tant piazuda e alóra al ghé spiega ch’an
n’è miga “galateo” tirär zo la pu grosa.
Al ragas alóra al ghé dmanda:
"Vu co' arisov tòt ?" - "Mi ariss tòt la pu picén'na".
"Alóra sèmma a post: gh'é restè propria la pu picén'na.